Lansiwyd rhaglen addysgol diogelwch rheilffyrdd heddiw (dydd Gwener 20 Medi) yng Nghymru gan Ysgrifennydd y Cabinet dros Drafnidiaeth a Gogledd Cymru, Ken Skates.
Crëwyd Rail Safe Friendly gan Learn Live ac mae’n dysgu pobl ifanc am beryglon tresmasu ar reilffyrdd Prydain, gyda’r nod o godi ymwybyddiaeth, achub bywydau ac atal anafiadau.
Daeth Trafnidiaeth Cymru, Network Rail a Learn Live ynghyd i lansio’r rhaglen yn Ysgol Bryn Alyn yn Wrecsam.
Mae’r rhaglen yn rhoi cyfle i ysgolion a’r diwydiant rheilffyrdd gydweithio tuag at nod cyffredin o addysgu plant a phobl ifanc am y peryglon niferus sy’n bresennol ar y rheilffordd.
Darperir addysg diogelwch rheilffyrdd drwy ddarllediadau byw neu ar alw gan ddefnyddio’r sianel Learn Live a chaiff ei defnyddio’n ddigidol mewn ystafelloedd dosbarth neu neuaddau ymgynnull.
Dywedodd Ysgrifennydd y Cabinet dros Drafnidiaeth a Gogledd Cymru, Ken Skates: “ Mae pwysigrwydd cydweithio i addysgu pobl ifanc am ddiogelwch rheilffyrdd yn glir.
“Mae’n bwysig cofio bod y rheilffordd yn ddiogel i’r rhai sy’n ei defnyddio’n gywir ac mae negeseuon diogelwch yn achub bywydau. Rwy’n falch o fod yma i nodi lansio’r ymgyrch Rheilffordd Ddiogel yma yng Nghymru.”
“Mae’n wych bod yma yn Ysgol Bryn Alyn a gallu trafod y mater pwysig hwn gyda’r disgyblion.”
Dywedodd Melanie Lawton, Arweinydd Strategaeth Rheilffyrdd Cymunedol, TrC: “Rydym yn falch o bartneru â Learn Live i ddod â’r rhaglen hon i ysgolion yng Nghymru. Mae tresmasu ar y rheilffordd yn parhau i fod yn risg uchel ac mae’r risg hyd yn oed yn fwy gyda chyflwyniad Offer Llinell Uwchben (OLE) a mwy o wasanaethau ar y rhwydwaith.”
Dywedodd Stuart Heaton, Rheolwr Gyfarwyddwr Rail Safe Friendly a Learn Live: “Rydym wrth ein bodd yn gweithio gyda Thrafnidiaeth Cymru a Network Rail Wales ar y rhaglen Rail Safe Friendly. Drwy eu cefnogaeth byddwn yn gallu cyrraedd hyd yn oed mwy o blant gydag ymwybyddiaeth hanfodol o ddiogelwch rheilffyrdd gyda’r nod o achub bywydau ac atal anafiadau ar rwydwaith rheilffyrdd y wlad ac mewn iardiau, depos a chlidffyrdd.
“Mae’n hanfodol bod plant yn derbyn gwybodaeth hanfodol, yn ifanc, i’w cadw’n ddiogel ar y rheilffyrdd. Mae’r rhaglen Rail Safe Friendly yn ceisio addysgu plant a phobl ifanc am y nifer o beryglon sy’n bresennol ar y rheilffordd.”
